Молитвы для общенародного пения

I. НА ВСЕНОЩНОМ БДЕНИИ

НА ВЕЧЕРНЕ:

Сподоби, Господи, в вечер сей без греха сохранится нам. Благословен еси, Господи, Боже отец наших, и хвально и прославлено имя Твое во веки, аминь. Буди, Господи, милость Твоя на нас, якоже уповахом на Тя. Благословен еси, Господи, научи мя оправданием Твоим. Благословен еси, Владыко, вразуми мя оправданием Твоим. Благословен еси, Святый, просвети мя оправдании Твоими. Господи, милость Твоя во век: дел Руку Твоею не презри. Тебе подобает хвала, Тебе подобает пение, Тебе слава подобает, Отцу и Сыну и Святому Духу, ныне и присно и во веки веков. Аминь.

Песнь Пресвятой Богородице

Богородице Дево, радуйся, Благодатная Марие, Господь с Тобою; благословена Ты в женах и благословен Плод чрева Твоего, яко Спаса родила еси душ наших.

Псалом 33

Благословлю Господа на всякое время,/ выну хвала Его во устех моих. О Господе похвалится душа моя,/ да услышат кротции, и возвеселятся. Возвеличите Господа со мною,/ и вознесем имя Его вкупе. Взысках Господа и услыша мя,/ и от всех скорбей моих избави мя. Приступите к Нему и просветитеся,/ и лица ваша не постыдятся. Сей нищий воззва, и Господь услыша и,/ и от всех скорбей его спасе и. Ополчится Ангел Господень окрест боящихся Его,/ и избавит их. Вкусите и видите, яко благ Господь;/

блажен муж, иже уповает Нань. Бойтеся Господа вси святии Его,/ яко несть лишения боящимся Его. Богатии обнищаша и взалкаша;/ взыскающии же Господа не лишатся всякаго блага. Приидите, чада, послушайте мене,/ страху Господню научу вас. Кто есть человек хотяй живот,/ любяй дни видети благи? Удержи язык твой от зла,/ и устне твои, еже не глаголати льсти. Уклонися от зла, и сотвори благо,/ взыщи мира, и пожени и. Очи Господни на праведныя,/ и уши Его в молитву их. Лице же Господне на творящия злая,/ еже потребити от земли память их. Воззваша праведнии, и Господь услыша их,/ и от всех скорбей их избави их. Близ Господь сокрушенных сердцем,/ и смиренныя духом спасет. Многи скорби праведным,/ и от всех их избавит я Господь. Хранит Господь вся кости их,/ ни едина от них сокрушится. Смерть грешников люта,/ и ненавидящии праведнаго прегрешат. Избавит Господь души раб Своих,/ и не прегрешат вси уповающии на Него.

НА УТРЕНИ:

Воскресная песнь после Евангелия

Воскресение Христово видевше,/ поклонимся Святому Господу Иисусу,/ Единому Безгрешному./ Кресту Твоему покланяемся, Христе,/ и святое Воскресение Твое поем и славим:/ Ты бо еси Бог наш,/ разве Тебе иного не знаем,/ имя Твое именуем./ Приидите, вси вернии,/ поклонимся святому Христову Воскресению;/ се бо прииде Крестом радость всему миру./ Всегда благословяще Господа,/ поем Воскресение Его;/ распятие бо претерпев,/ смертию смерть разруши.

Песнь Пресвятой Богородицы

Величит душа Моя Господа,/ и возрадовася дух Мой о Бозе Спасе Моем.

Яко призре на смирение Рабы Своея,/ се бо отныне ублажат Мя вси роди.

Яко сотвори Мне величие Сильный,/ и свято имя Его, и милость Его в роды родов боящимся Его.

Сотвори державу мышцею Своею,/ расточи гордыя мыслию сердца их.

Низложи сильныя со престол,/ и вознесе смиренныя; алчущия исполни благ,/ и богатящияся отпусти тщи.

Восприят Израиля отрока Своего,/ помянута милости,/ якоже глагола ко отцем нашим, Аврааму и семени его, даже до века.

К каждому стиху припев:

Честнейшую Херувим/ и Славнейшую без сравнения Серафим,/ без ис-

тления Бога Слова рождшую,/ сущую Богородицу, Тя величаем.

ПОСЛЕ 1-ГО ЧАСА:

Взбранной Воеводе победительная,/ яко избавльшеся от злых,/ благодарственная восписуем Ти раби Твой, Богородице;/ но яко имущая державу непобедимую,/ от всяких нас бед свободи да зовем Ти:/ радуйся, Невесто Неневестная.

ПО ОКОНЧАНИИ ВСЕНОЩНОГО БДЕНИЯ

в некоторых храмах поют:

Под Твою милость прибегаем, Богородице Дево: молений наших не презри в скорбех, но от бед избави нас, Едина Чистая и Благословенная.

Царице моя Преблагая, надеждо моя Богородице, приятелище сирых и странных предстательнице, скорбящих радосте, обидимых покровительнице! Зриши мою беду, зриши мою скорбь, помози ми яко немощну, окорми мя яко странна. Обиду мою веси, разреши ту, яко волиши: яко не имам иныя помощи, разве Тебе, ни иныя предстательницы, ни благия утешительницы, токмо Тебе, о Богомати, яко да сохраниши мя и покрыеши во веки веков. Аминь.

П. НА БОЖЕСТВЕННОЙ ЛИТУРГИИ

Символ веры

Верую во Единаго Бога Отца, Вседержителя, Творца небу и земли, видимым же всем и невидимым. И во единаго Господа Иисуса Христа, Сына Божия, Единороднаго, Иже от Отца рожденного прежде всех век; Света от Света, Бога истинна от Бога истинна, рожденна, несотворенна, единосущна Отцу, Имже вся быша. Нас ради человек и нашего ради спасения сшедшаго с небес и воплотившагося от Духа Света и Марии Девы, и вочеловечшася. Распятаго же за ны при Понтийстем Пилате, и страдавша, и погребенна. И воскресшаго в третий день по Писанием. И возшедшаго на небеса, и седяща одесную Отца. И паки гряду-щаго со славою судити живым и мертвым, Егоже Царствию не будет конца. И в Духа Святаго, Господа, Животворящаго, Иже от Отца исходящаго, Иже со От-цем и Сыном спокланяема и славима, глаголавшаго пророки. Во Едину, Святую, Соборную и Апостольскую Церковь. Исповедую едино крещение во оставление грехов. Чаю воскресения мертвых, и жизни будущаго века. Аминь.

Молитва Господня

Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго

Во время причащения верующих Святых Христовых Тайн поется:

Тело Христово пришлите, источника безсмертнаго вкусите.

III. ПЕСНОПЕНИЯ, ПОЕМЫЕ НА МОЛЕБНАХ

Молитва Святому Духу

Царю Небесный,/ Утешителю, Душе истины,/ Иже везде сый/ и вся исполняяй,/ Сокровище благих/ и жизни Подателю,/ прииди и вселися в ны,/ и очисти ны от всякия скверны,/ и спаси, Блаже, души наша.

Благодарственный Спасителю, глас 4

Благодарни суще недостойнии раби Твои, Господи,/ о Твоих великих благодеяниих на нас бывших,/ славяще Тя хвалим, благословим, благодарим, поем и величаем Твое благоутробие,/ и рабски любовию вопием Ти:// Благодетелю Спасе наш, слава Тебе.

Тропари, глас 4

К Богородице прилежно ныне притецем,/ грешнии и смиреннии, и припадем,/ в покаянии зовуще из глубины души:/ Владычице, помози, на ны милосердовавши,/ потщися, погибаем от множества прегрешений,/ не отврати Твоя раби тщи,// Тя бо и Едину надежду имамы.

Не умолчим никогда, Богородице,/ силы Твоя глаголати, недостойнии:/ аще бо Ты не бы предстояла молящи,/ кто бы нас избавил от толиких бед,/ кто же бы сохранил до ныне свободны?/ Не отступим, Владычице, от Тебе:/ Твоя бо рабы спасаеши присно от всяких лютых.

Кондаки, глас 6

Предстательство христиан непостыдное,/ ходатайство ко Творцу непреложное,/ не презри грешных молений гласы,/ но предвари, яко Благая, на помощь нас,/ верно зовущих Ти;/ ускори на молитву, и потщися на умоление,/ предстательствующи присно, Богородице, чтущих Тя.

Не имамы иныя помощи,/ не имамы иныя надежды,/ разве Тебе, Пречистая Дево./ Ты нам помози,/ на Тебе надеемся,/ и Тобою хвалимся,/ Твои бо есмы раби,/ да не постыдимся.

ТРОПАРИ И ВЕЛИЧАНИЯ ОБЩИЕ СВЯТЫМ

Пророку: Тропарь

Пророка Твоего (имя) память, Господи, празднующе,/ тем Тя молим:/ спаси души наша.

Величание

Величаем тя,/ пророче Божий (имя),/ и чтим святую память твою./ Ты бо молиши за нас// Христа Бога нашего.

Апостолу: Тропарь

Апостоле святый (имя),/ моли милостиваго Бога,/ да прегрешений оставление// подаст душам нашим.

Величание

Величаем тя,/ апостоле Христов (имя)/ и чтим болезни и труды твоя,/ имиже трудился еси// во благовестии Христове.

Святителю: Тропарь

Правило веры и образ кротости,/ воздержания учителя,/ яви тя стаду твоему,/ яже вещей истина:/ сего ради стяжал еси смирением высокая,/ нищетою богатая. Отче (имя), моли Христа Бога// спастися душам нашим.

Величание

Величаем тя,/ святителю отче (имя),/ и чтим святую память твою:/ ты бо молиши за нас// Христа Бога нашего.

Преподобному: Тропарь

В тебе, отче, известно спасеся еже по образу:/ приим бо крест, последовал еси Христу,/ и дея учил еси презирати убо плоть: преходит бо,/ прилежати же о души, вещи безсмертней.// Темже и со Ангелы срадуется, преподобие (имя), дух твой.

Величание

Ублажаем тя,/ преподобне отче (имя),/ и чтим святую память твою,/ наставниче монахов// и собеседниче Ангелов.

Мученику: Тропарь

Мученик Твой, Господи, (имя),/ во страдании своем венец прият нетленный от Тебе, Бога нашего:/ имеяй бо крепость Твою,/ мучителей низложи,/ сокруши и демонов немощныя дерзости./ Того молитвами// спаси души наша.

Величание

Величаем тя,/ страстотерпче святый (имя), и чтим честная страдания твоя,/ яже за Христа// претерпел еси.

Мученице: Тропарь

Агница Твоя, Иисусе, (имя),/ зовет велиим гласом:/ Тебе, Женише мой, люблю,/ и Тебе ищущи страдальчествую,/ и сраспинаюся, и спогребаюся крещению Твоему,/ и стражду Тебе ради,/ яко да царствую в Тебе, и умираю за Тя,/ да и живу с Тобою;/ но

яко жертву непорочную приими мя, с любовию пожершуюся Тебе./ Тоя молитвами,// яко Милостив, спаси души наша.

Величание

Величаем тя,/ страстотерпице Христова (имя),/ и чтим честное страдание твое, еже за Христа претерпела еси.

IV. ТРОПАРИ И ВЕЛИЧАНИЯ НА ПРАЗДНИКИ ГОСПОДНИ,

БОГОРОДИЧНЫ И СВЯТЫХ ВЕЛИКИХ

РОЖДЕСТВО ПРЕСВЯТОЙ БОГОРОДИЦЫ

(сентября 8/21)

Тропарь, глас 4

Рождество Твое, Богородице Дево,/ радость возвести всей вселенней:/ из Тебе бо возсия Солнце Правды, Христос Бог наш,/ и разрушив клятву, даде благословение,/ и упразднив смерть, дарова нам живот вечный.

Величание

Величаем Тя,/ Пресвятая Дево,/ и чтим святых Твоих родителей,/ и всеславное славим/ Рождество Твое.

ВОЗДВИЖЕНИЕ ЧЕСТНАГО И ЖИВОТВОРЯЩАГО КРЕСТА

(сентября 14/27)

Тропарь, глас 1

Спаси, Господи, люди Твоя/ и благослови достояние Твое,/ победы на сопротивныя даруя,// и Твое сохраняя Крестом Твоим жительство.

Величание

Величаем Тя,/ Живодавче Христе,/ и чтим Крест Твой Святый,/ имже нас спасл еси/ от работы вражия.

На поклонение Кресту

Кресту Твоему покланяемся, Владыко, и святое Воскресение Твое славим.

Память преп. Сергия Радонежского

(сентября 25/8)

Тропарь, глас 4

Иже добродетелей подвижник,/ яко истинный воин Христа Бога, на страсти вельми подвизался еси в жизни временней,/ в пениих, бдениих же и пощениих образ быв твоим учеником. Темже и вселися в тя Пресвятый Дух,/ Егоже действием светло украшен еси;/ но яко имея дерзновение ко Святей Троице, поминай/ стадо, еже собрал еси мудре, и не забуди, якоже обещался еси,/ посещая чад твоих,/ Сергие Преподобие отче наш.

Величание

Ублажаем тя, преподобие отче Сергие, и чтим святую память твою, наставниче монахов и собеседниче Ангелов.

Преставление св. апостола и евангелиста Иоанна Богослова

(сентября 26/9; мая 8/21)

Тропарь, глас 2

Апостоле Христу Богу возлюбленне,/ ускори избавити люди безответны,/ приемлет тя припадающа,/ Иже падша на перси приемый:/ Егоже моли, Богослове,/ и належащую мглу языков разгнати,/ прося нам мира и велия милости.

Величание

Величаем тя, апостоле Христов и евангелисте Иоанне Богослове, и чтим болезни и труды твоя, имиже трудился еси во благовестии Христове.

Память святителя Тихона, Патриарха Московского и всея Руси

(сентября 26/9; марта 25/7)

Тропарь святителю, глас 1

Апостольских преданий ревнителя/ и Христовы Церкве пастыря добраго/, душу свою за овцы положившаго/ жребием Божиим избраннаго/ Всероссийскаго Патриарха Тихона восхвалим/ и к нему с верою и упованием возопиим:/ предстательством святительским ко Господу/ Церковь Русскую в тишине соблюди,/ расточенная чада ея во едино стадо собери,/ отступившия от правыя веры к покаянию обрати,/ страну нашу от междоусобныя брани сохрани/ и мир Божий людем испроси// и душам нашим велию милость.

Величание

Величаем тя,/ святителю отче наш Тихоне,/ и чтим святую память твою: ты бо молиши за нас// Христа Бога нашего.

Покров Пресвятой Богородицы

(октября 1/14)

Тропарь, глас 4

Днесь благовернии людие,/ светло празднуем,/ осеняеми Твоим, Богомати, пришествием,/ и к Твоему взирающе Пречистому образу,/ умильно глаголем:/ покрый нас честным Твоим покровом,/ и избави нас от всякаго зла,/ молящи Сына Твоего, Христа Бога нашего,/ спасти души наша.

Величание

Величаем Тя, Пресвятая Дево, и чтим Покров Твой честный: Тя бо виде святьш Андрей на воздусе, за ны Христу молящуюся.

Празднование в честь чудотворной иконы Божией Матери “Иверская”

(октября 13/26; февраля 12/25)

Тропарь, глас 1

От святыя иконы Твоея,/ о Владычице Богородице,/исцеления и цельбы подаются обильно,/ с верою и любовию приходящим к ней:/ тако и мою немощь посети,/ и душу мою помилуй, Благая,/ и тело исцели благодатию Твоею, Пречистая.

Величание

Величаем Тя,/ Пресвятая Дево/ Богоизбранная Отроковице,/ и чтим образ Твой святый,/ имже точиши исцеления// всем с верою притекающим.

Празднование в честь чудотворной иконы Божией Матери “Казанская”

(июля 8/21; октября 22/4)

Тропарь, глас 4

Заступнице усердная,/ Мати Господа Вышняго,/ за всех молиши Сына Твоего, Христа Бога нашего,/ и всем твориши спастися,/ в державный Твой покров прибегающим:/ всех нас заступи, о Госпоже Царице и Владычице,/ иже в напастех, и в скорбех, и в болезнех, обремененных грехми многими,/ предстоящих и молящихся Тебе умиленною душею/ и сокрушенным сердцем/ пред пречистым Твоим образом со слезами,/ и невозвратно надежду имущих на Тя, избавления всех зол,/ всем полезная даруй,/ и вся спаси, Богородице Дево,/ Ты бо еси Божественный покров рабом Твоим.

Величание

Величаем Тя,/ Пресвятая Дево/ Богоизбранная Отроковице/ и чтим образ Твой святый,/ имже точиши исцеления// всем с верою притекающим.

Празднование в честь чудотворной иконы Божией Матери “Всех скорбящих Радость”

(июля 23/5; октября 24/6)

Тропарь, глас 2

Всех скорбящих Радосте,/ и обидимых заступнице,/ и алчущих питательнице, странных утешение,/ обуреваемых пристанище, больных посещение,/ немощных покрове и заступнице, жезле старости,/ Мати Бога Вышняго Ты еси, Пречистая:/ потщися, молимся, спастися рабом Твоим.

Величание

Собор Архистратига Божия Михаила и прочих Небесных сил бесплотных

(ноября 8/21)

Тропарь, глас 4

Небесных воинств Архистратизи,/ молим вас присно мы недостойнии:/ да вашими молитвами оградите нас/ кровом крил невещественныя вашея славы,/ сохраняюще ны припадающия прилежно, и вопиющия:/ от бед избавите ны,/ яко чиноначальницы вышних сил.

Величания

Величаем вас, Архангели и Ангели и вся воинства, Херувими и Серафими, славящия Господа.

Величаем тя, Архистратиже Божий Михаиле, Архангели и Ангели и вся воинства, Херувими и Серафими, славящия Господа.

ВВЕДЕНИЕ ВО ХРАМ ПРЕСВЯТОЙ БОГОРОДИЦЫ

(ноября 21/4)

Тропарь, глас 4

Днесь благоволения Божия предображение,/ и человеков спасения проповедание,/ в храме Божии ясно Дева является, и Христа всем предвозвещает,/ Той и мы велегласно возопиим:/ радуйся, смотрения Зиждителева исполнение.

Величание

Величаем Тя, Пресвятая Дево, Богоизбранная Отроковице, и чтим еже в храм Господень вхождение Твое.

Память святителя Николая, архиепископа Мирликийского

(декабря 6/19; мая 9/22)

Тропарь, глас 4

Правило веры и образ кротости,/ воздержания учителя/ яви тя стаду твоему,/ яже вещей истина./ Сего ради стяжал еси смирением высокая,/ нищетою богатая:/ отче священнона-чальниче Николае,/ моли Христа Бога/ спастися душам нашим.

Величание

Величаем тя,/ святителю отче Николае,/ и чтим святую память твою,/ ты бо молиши за нас/ Христа Бога нашего.

Память святого праведного Иоанна Кронштадтского

(декабря 20/2)

Тропарь, глас 1

Православный веры поборниче, земли Российския печальниче, пастырем правило и образе верным, покаяния и жизни во Христе проповедниче, Божественных Тайн благоговейный служителю и дерзновенный о людех молитвенниче, отче праведный Иоанне, целителю и предивный чудотворче, граду Кронштадту похвало и Церкве нашея украшение, моли Все-благаго Бога умирити мир и спасти души наша.

Величание

Величаем тя,/ святый и праведный отче наш Иоанне,/ и чтим святую память твою,/ ты бо молиши за нас Христа Бога нашего.

РОЖДЕСТВО ГОСПОДА НАШЕГО ИИСУСА ХРИСТА

(декабря 25/7)

Тропарь, глас 4

Рождество Твое, Христе Боже наш,/ возсия мирови свет разума:/ в нем бо звездам служащии,/ звездою учахуся,/ Тебе кланятися Солнцу Правды,/ и Тебе ведети с высоты востока:/ Господи, слава Тебе.

Кондак, глас 3

Дева днесь Пресущественнаго раждает,/ и земля вертеп Неприступному приносит:/ Ангели с пастырьми славословят,/ волсви же со звездою путешествуют:/ нас бо ради родися/ Отроча младо, превечный Бог.

Величание

Величаем Тя, Жизнодавче Христе,/ нас ради ныне плотию рождшагося/от Безневестныя/ и Пречистыч Девы Марии.

Обрезание Господне

(январь 1/14)

Тропарь, глас 1

На престоле огнезрачнем / в вышних седяй со Отцем Безначальным и Божественным Твоим Духом,/ благоволил еси родитися на земли от Отроковицы,/ неискусомужныя Твоей Матере, Иисусе;/ сего ради и обрезан был еси,/ яко человек осмодневный,/ слава всеблагому Твоему совету,/ слава смотрению Твоему,/ слава снизхождению Твоему, Едине Человеколюбче.

Память преп. Серафима Саровского

(января 2/15; июля 19/1)

Тропарь, глас 4

От юности Христа возлюбил еси, блаженне, и Тому Единому работати пламенне вожделев, непрестанною молитвою и трудом в пустыни подвизался еси, умиленным же сердцем любовь Христову стяжав, избранник возлюблен Божия Матере явился еси. Сего ради вопием ти: спасай нас молитвами твоими, Серафиме, преподобие отче наш.

Величание

Ублажаем тя,/ преподобие отче наш Серафиме,/ и чтим святую память твою,/ наставниче монахов/ и собеседниче Ангелов.

КРЕЩЕНИЕ ГОСПОДНЕ. БОГОЯВЛЕНИЕ

(января 6/19)

Тропарь, глас 1

Во Иордане крещающуся Тебе, Господи,/ Троическое явися поклонение:/ Родителев бо глас свидетельствовавше Тебе,/ возлюбленнаго Тя Сына именуя,/ и Дух, в виде голубине,/ извествоваше словесе утверждение./ Явлейся, Христе Боже,// и мир просвещей, слава Тебе.

Величание

Величаем тя,/ Живодавче Христе,/ нас ради ныне плотию крестившагося/ от Иоанна/ в водах иорданских.

Память блаженной Ксении Петербургской

(января 24/6)

Тропарь, глас 7

Нищету Христову возлюбивши,/ безсмертныя трапезы ныне наслаждаешися,/ безумием мнимым безумие мира обличивши,/ смирением крестным силу Божию восприяла еси./ Сего ради дар чудодейственныя помощи стяжавшая,/ Ксение блаженная, моли Христа Бога// избавится нам от всякаго зла покаянием.

СРЕТЕНИЕ ГОСПОДНЕ

(февраля 2/15)

Тропарь, глас 1

Радуйся, Благодатная, Богородице Дево,/ из Тебе бо возсия Солнце Правды, Христос Бог наш,/ просвещаяй сущия во тьме./ Веселися и ты, старче праведный,/ приемый во объятия Свободителя душ наших,/ дарующаго нам воскресение.

Величание

Величаем Тя, Живодавче Христе,/ и чтим Пречистую Матерь Твою,/ Еюже по закону ныне/ принеслся еси в храм Господень.

Память святителя Алексия, Митрополита Московского

(февраля 12/25; мая 20/2)

Тропарь, глас 8

Яко апостолам сопрестольна и врача предобра,/ и служителя благоприятна,/ к раце твоей честней притекающе, святителю Алексие богомудре, чудотворче,/ сошедшеся любовию в память твою светло празднуем,/ в песнех и пениих радующеся и Христа славяще,/ таковую благодать тебе Даровавшаго исцелений// и граду твоему великое утверждение.

Величание

Величаем тя,/ святителю отче наш Алексие/ и чтим святую память твою/ ты бо молиши за нас/ Христа Бога нашего.

БЛАГОВЕЩЕНИЕ ПРЕСВЯТОЙ БОГОРОДИЦЫ

(марта 25/7)

Тропарь, глас 4

Днесь спасения нашего главизна,/ и еже от века таинства явление:/ Сын Божий, Сын Девы бывает,/ и Гавриил благодать благовествует./ Темже и мы с ним Богородице возопийм:/ радуйся, Благодатная, Господь с Тобою.

Величание

Архангельский глас/ вопием Ти,/ Чистая: радуйся,/ Благодатная,/ Господь с Тобою.

Память великомученика Георгия Победоносца

(апреля 23/6)

Тропарь, глас 4

Яко пленных свободитель / и нищих защититель,/ немощствующих врач,/ Победоносче великомучениче Георгие,// моли Христа Бога спастися душам нашим.

Величание

Величаем Тя,/ святый великомучениче Георгие, и чтим честная страдания твоя,/ яже за Христа/ претерпел еси.

Память святых равноапостольных Кирилла и Мефодия, учителей Словенских

(мая 11/24)

Тропарь, глас 4

Яко апостолом единонравнии/ и Словенских стран учителие,/ Кирилле и Мефодие богомудрии,/ Владыку всех молите/ вся языки словенския утвердити/ в православии и единомыслии,// умирити мир и спасти души наша.

Величание

Величаем вас, святии равноапостольнии Мефодие и Кирилле, вся Словенския страны ученьми своими просветившия и ко Христу приведшия.

Празднование в честь чудотворной иконы Божией Матери “Владимирская”

(июня 23/6; августа 26/8)

Тропарь, глас 4

Днесь светло красуется славнейший град Москва,/ яко зарю солнечную восприимши, Владычице, чудотворную Твою икону,/ к ней же мы ныне притекающе и молящеся, Тебе взываем сице/ о пречудная Владычице Богородице!/ Молися из Тебе воплощенному Христу Богу нашему,/ да избавит град сей/ и вся грады христианския невредимы от всех навет вражиих,/ и спасет души наша, яко Милосерд.

Величание

Величаем Тя,/ Пресвятая Дево/, Богоизбранная Отроковице,/ и чтим образ Твой святый,/ имже точиши исцеления// всем с верою притекающим.

Рождество Иоанна Предтечи и Крестителя Господня

(июня 24/7)

Тропарь, глас 4

Пророче и Предтече Пришествия Христова,/ достойно восхвалити Тя недоумеем мы,/ любовию чтущия Тя:/ неплодство бо рождшия и отчее безгласие разрешися/ славным и честным твоим Рождеством, и воплощение Сына Божия/ мирови проповедуется.

Величание

Величаем тя,/ Предтече Спасов Иоанне,/ и чтим еже от неплодове/ преславное Рождество твое.

Память святых первоверховных апостолов Петра и Павла

(июня 29/12)

Тропарь, глас 4

Апостолов первопрестольницы,/ и вселенныя учйтелие,/ Владыку всех молите/ мир вселенней даровати// и душам нашим велию милость.

Величание

Величаем вас,/ апостоли Христовы Петре и Павле,/ весь мир ученьми своими просветившия/ и вся концы/ ко Христу приведший.

Память святого пророка Божия Илии

(июля 20/2)

Тропарь, глас 4

Во плоти Ангел,/ пророков основание,/ вторьш предтеча Пришествия Христова Илия славный,/ свыше пославый Елисееви благодать,/ недуги отгоняти/ и прокаженныя очищати.// Темже и почитающим его точит исцеление.

Величание

Величаем тя,/ святый пророче Божий Илие,/ и почитаем еже на колеснице огненней/ преславное восхождение твое.

Память великомученика и целителя Пантелеймона

(июля 27/9)

Тропарь, глас 3

Страстотерпче святый и целебниче Пантелеймоне,/ моли милостиваго Бога,/ да прегрешений оставление// подаст душам нашим.

Величание

Величаем тя,/ святый великомучениче Пантелеймоне, / и чтим честная страдания твоя,/ яже за Христа/ претерпел еси.

ПРЕОБРАЖЕНИЕ ГОСПОДНЕ

(августа 6/19)

Тропарь, глас 4

Преобразился еси на горе, Христе Боже,/ показавши учеником Твоим славу Твою,/ якоже можаху:/ да возсияет и нам, грешным,/ свет Твой присносущный,/ молитвами Богородицы,/ Светодавче, слава Тебе.

Величание

Величаем Тя,/ Живодавче Христе,/ и почитаем Пречистыя Плоти Твоей/ преславное Преображение.

УСПЕНИЕ ПРЕСВЯТОЙ БОГОРОДИЦЫ

(августа 15/28)

Тропарь, глас 1

В Рождестве девство сохранила еси,/ во Успении мира не оставила еси, Богородице,/ преставилася еси к Животу, Мати сущи Живота;/ и молитвами Твоими избавлявши от смерти души наша.

Величание

Величаем Тя,/ Пренепорочная Мати Христа Бога нашего,/ и всеславное славим/ Успение Твое.

Перенесение Нерукотворенного образа Господа Иисуса Христа

(августа 16/29)

Тропарь

Пречистому образу Твоему покланяемся, Благий,/ просяще прощений прегрешений наших, Христе Боже:/ волею бо благоволил еси плотию взыти на крест,/ да избавиши яже создал еси от работы вражия./ Тем благодарственно вопием Ти:/ радости исполни еси вся, Спасе наш,// пришедый спасти мир.

Величание

Величаем Тя, Живодавче Христе, и почитаем вси Пречистаго лика Твоего преславное изображение.

Усекновение главы Пророка, Предтечи и Крестителя Господня Иоанна

(августа 29/11)

Тропарь, глас 4

Память праведнаго с похвалами,/ тебе же довлеет свидетельство Господне, Предтече:/ показал бо ся еси воистинну и пророков честнейший,/ яко в струях крестити сподобился еси Проповеданнаго. Темже за истину пострадав радуйся,/ благовестил еси и сущим во аде Бога явльшагося плотию,/ вземлющаго грех мира,/ и подающаго нам велию милость.

Величание

Величаем Тя,/ Крестителю Спасов Иоанне,/ и почитаем вси честныя Твоея главы усекновение.

V. ПЕСНОПЕНИЯ ИЗ СЛУЖБ ВЕЛИКОГО ПОСТА

В Неделю мытаря и фарисея

Покаяния отверзи ми двери, Жизнодавче, утренюет бо дух мой ко храму святому Твоему, храм носяй телесный весь осквернен; но яко щедр, очисти благоутробною Твоею милостию.

На спасения стези настави мя, Богородице, студными бо окалях душу грехми и в лености все житие мое иждих; но Твоими молитвами избави мя от всякия нечистоты.

Во Святой и Великий Понедельник, на утрени

Тропарь, глас 8

Се Жених грядет в полунощи,/ и блажен раб, егоже обрящет бдяща,/недостоин же паки, егоже обрящет унывающа./ Блюди убо, душе моя,/ не сном отяготися,/ да не смерти предана будеши,/ и Царствия вне затворишися,/ но воспряни зовущи:/Свят, Свят, Свят еси, Боже,/ Богородицею помилуй нас.

На литургии Преждеосвященных Даров

Да исправится молитва моя,/ яко кадило пред Тобою:/ воздеяние руку моею,/ жертва вечерняя.

Господи, воззвах к Тебе, услыши мя;/ вонми гласу моления моего,/ внегда воззвати ми к Тебе.

Положи, Господи, хранение устом моим/ и дверь ограждения о устнах моих.

Не уклони сердце мое в словеса лукавствия,/ непщевати вины о гресех.

В Неделю третью Великого поста — Крестопоклонную

Тропарь, глас 1

Спаси, Господи, люди Твоя/ и благослови достояние Твое,/ победы на сопротивныя даруя,/ и Твое сохраняя Крестом Твоим жительство.

На поклонении Кресту

Тропарь, глас 6

Кресту Твоему покланяемся, Владыко, и святое Воскресение Твое славим.

Во время причащения верующих в Великий Четверток поется:

Вечери Твоей Тайныя днесь, Сыне Божий, причастника мя приими; не бо врагом Твоим тайну повем, ни лобзания Ти дам, яко Иуда, но яко разбойник исповедаю Тя: помяни мя, Господи, во Царствии Твоем.

VII. ПЕСНОПЕНИЯ ИЗ СЛУЖБ СВЯТОЙ ПАСХИ

Стихира, глас 6

Воскресение Твое, Христе Спасе,/ Ангели поют на небесех,/ и нас на земли сподоби/ чистым сердцем/ Тебе славити.

Тропарь, глас 5

Христос воскресе из мертвых,/ смертию смерть поправ,/ и сущим во гробех живот даровав.

Кондак, глас 8

Аще и во гроб снизшел еси, Безсмертне,/ но адову разрушил еси силу,/ и воскресл еси яко Победитель, Христе Боже,/ женам мироносицам вещавый: радуйтеся,/ и Твоим апосто-

лом мир даруяй,/ падшим подаяй воскресение.

Ексапостиларий

Плотию уснув,/ яко мертв,/ Царю и Господи,/ тридневен воскресл еси,/ Адама воздвиг от тли,/ и упразднив смерть:/ Пасха нетления,/ мира спасение. (Трижды)

СТИХИРЫ ПАСХИ

Глас 5

Стих: Да воскреснет Бог, и расточатся врази Его.

Пасха/ священная нам днесь показася:/ Пасха нова святая,/ Пасха таинственная,/ Пасха всечестная,/ Пасха Христос Избавитель,/ Пасха непорочная,/ Пасха великая,/ Пасха верных,/ Пасха, двери райския нам отверзающая,/ Пасха всех освящающая верных.

Стих: Яко исчезает дым, да исчезнут.

Приидите/ от видения жены благовестницы,/ и Сиону рцыте:/ приими от нас радости благовещения Воскресения Христова;/ красуйся, ликуй/ и радуйся, Иерусалиме,/ Царя Христа узрев из гроба,/ яко Жениха происходяща.

Стих: Тако да погибнут грешницы от лица Божия, а праведницы да возвеселятся.

Мироносицы жены,/ утру глубоку, представит гробу Живодавца,/ обретоша Ангела,/ на камени седяща,/ и той провещав им/ сице глаголаше:/ что ищете Живаго с мертвыми?/ Что плачете Нетленнаго во тли?/ Шедше проповедите учеником Его.

Стих: Сей день, егоже сотвори Господь, возрадуемся и возвеселимся в онь.

Пасха красная,/ Пасха, Господня Пасха!/ Пасха всечестная нам возсия./ Пасха!/ Радостию друг друга обымем./ О Пасха!/ Избавление скорби,/ ибо из гроба днесь/ яко от чертога/ возсияв Христос,/ жены радости исполни, глаголя:/ проповедите апостолом.

Слава, и ныне, глас 5

Воскресения день,/ и просветимся торжеством,/ и друг друга обымем./ Рцем, братие,/ и ненавидящим нас/ простим вся Воскресением,/ и тако возопийм:/ Христос воскресе из мертвых,/ смертию смерть поправ,/ и сущим во гробех живот даровав.

Христос воскресе... (Трижды)

ЧАСЫ СВЯТОЙ ПАСХИ

Христос воскресе из мертвых,/ смертию смерть поправ,/ и сущим во гробех живот даровав. (Трижды)

Воскресение Христово видевшее….(трижды)

Предварившия утро яже о Марии,/ и обретшия камень отвален от гроба,/ слышаху от Ангела:/ во свете присносущнем Сущаго,/ с мертвыми что ищете яко человека?/ Видите гробныя пелены,/ тецыте и миру проповедите,/ яко воста Господь, умертвивый смерть,/ яко есть Сын Бога,/ спасающаro род человеческий.

Аще и во гроб... (см. стр. ).

Во гробе плотски, во аде же с душею яко Бог,/ в рай же с разбойником, и на престоле был еси, Христе, со Отцем и Духом,/ вся исполняяй, Heописанный.

Слава: Яко Живоносец, яко рая краснейший,/ воистинну и чертога всякаго царскаго показася, светлейший, Христе, гроб Твой,/ источник нашего воскресения.

И ныне: Вышняго освященное Божественное селение, радуйся:/ Тобою бо дадеся радость, Богородице, зовущим: / Благословена Ты в женах еси, Всенепорочная Владычице.

Господи, помилуй. (40)

Слава Отцу и Сыну и Святому Духу, и ныне и присно, и во веки веков. Аминь.

Честнейшую Херувим / и Славнейшую без сравнения Серафим,/ без истления Бога Слова рождшую,/ сущую Богородицу, Тя величаем.

Именем Господним благослови, отче.

Христос воскресе... (Трижды)

Слава и ныне: Господи, помилуй. (Трижды). Благослови. И отпуст от иерея.

VII. ТРОПАРИ И ВЕЛИЧАНИЯ ПЕРЕХОДЯЩИХ ПРАЗДНИКОВ

ВХОД ГОСПОДЕНЬ В ИЕРУСАЛИМ. Неделя ваий, Цветоносная, Вербное воскресенье.

(Празднуется за неделю до Пасхи)

Тропарь, глас 1

Общее воскресение,/ прежде Твоей Страсти уверяя,/ из мертвых воздвигл еси Лазаря, Христе Боже,/ темже и мы яко отроцы, победы знамения носяще,/ Тебе, Победителю смерти, вопием:/ осанна в вышних,/ благословен Грядый во имя Господне.

Величание

Величаем Тя,/ Живодавче Христе,/ осанна в вышних,/ и мы Тебе вопием:/ благословен Грядый во имя Господне.

ВОЗНЕСЕНИЕ ГОСПОДНЕ

(Празднуется в сороковой день после Пасхи)

Тропарь, глас 4

Вознеслся еси во славе, Христе Боже наш,/ радость сотворивый учеником,/ обетованием Святаго Духа,/ извещенным им бывшим благословением,/ яко Ты еси Сын Божий, Избавитель мира.

Величание

Величаем Тя,/ Живодавче Христе,/ и почитаем еже на небеса с Пречистою Твоею Плотию/ Божественное вознесение.

ДЕНЬ СВЯТОЙ ТРОИЦЫ. ПЯТИДЕСЯТНИЦА

(Неделя 8-я по Пасхе)

Тропарь, глас 8

Благословен еси, Христе Боже наш,/ Иже премудры ловцы явлей,/ низпослав им Духа Святаго,/ и теми уловлей вселенную./ Человеколюбче, слава Тебе.

Величание

Величаем Тя,/ Живодавче Христе,/ и чтим Всесвятаго Духа Твоего,/ Егоже от Отца послал еси/ Божественным учеником Твоим.

Память всех святых

(В Неделю 1-ю по Пятидесятнице)

Тропарь, глас 4

Иже во всем мире мученик Твоих,/ яко багряницею и виссом,/ кровьми Церковь Твоя украсившися,/ теми вопиет Ти, Христе Боже:/ людем Твоим щедроты Твоя низпосли,/ мир жительству Твоему даруй // и душам нашим велию милость.

Величание

Величаем вас, апостоли, мученицы, пророцы и вси святии,/ и чтим святую память вашу,// вы бо молите за нас Христа Бога нашего.

Память всех святых, в земле Российской просиявших

(В Неделю 2-ю по Пятидесятнице)

Тропарь, глас 8

Якоже плод красный Твоего спасительнаго сеяния,/ земля Российская приносит Ти, Господи,/ и вся святьгя в той просиявшия./ Тех молитвами в мире глубоце// Церковь и страну нашу Богородицею соблюди, Многомилостиве.

VIII. ПЕСНОПЕНИЯ ИЗ ПАНИХИДЫ

Тропари, глас 4

Со духи праведных скончавшихся / душу раба Твоего [раб Твоих, рабы Твоей}, Спасе, упокой,/ сохраняя ю во блаженней жизни, иже у Тебе, Человеколюбие.

В покоищи Твоем, Господи,/ идеже вси святии Твой упокоеваются,/ упокой и душу раба Твоего [раб Твоих, рабы Твоей] яко един еси, Человеколюбец.

Слава: Ты еси Бог, сошедый во ад и узы окованных разрешивый, Сам и душу раба Твоего [раб Твоих, рабы Твоей] упокой.

И ныне: Едина Чистая и Непорочная Дево, Бога без семене рождшая, моли

59спастися души его [душам их, душе ея].

Кондак, глас 8

Со святыми упокой, /Христе, души раб Твоих [раба Твоего, рабы Твоей],/ идеже несть болезнь, ни печаль,/ ни воздыхание,/ но жизнь безконечная.

Икос: Сам Един еси Безсмертный,/ сотворивый и создавый человека:/ земнии убо от земли создахомся,/ и в землю туюжде пойдем,/ якоже повелел еси,/ создавый мя и рекий ми:/ яко земля еси и в землю отыдеши:/ аможе вси человецы пойдем,/ надгробное рыдание творяще песнь:/ аллилуиа, аллилуиа, аллилуиа.

Вечная память (Трижды). Души их во благих водворятся, и память их в род и род.

Святый Боже, Святый Крепкий, Святый Безсмертный, помилуй нас.

Содержание

I НА ВСЕНОЩНОМ БДЕНИИ

На вечерне:

Сподоби, Господи... .................. 3

Песнь Пресвятой Богородице ........... 4

Псалом 33 ......................... 4

На утрени:

Воскресная песнь после Евангелия ....... 6

Песнь Пресвятой Богородицы ........... 7

После 1-го часа:

Взбранной Воеводе победительная... ...... 8

По окончании всенощного бдения

Под Твою милость... .................. 8

Царице моя Преблагая... ............... 8

II. НА БОЖЕСТВЕННОЙ ЛИТУРГИИ

Символ веры ....................... 10

Молитва Господня ................... 11

III. ПЕСНОПЕНИЯ, ПОЕМЫЕ НА МОЛЕБНАХ

Царю Небесный ..................... 12

Благодарственный Спасителю .......... 12

Тропари:

К Богородице прилежно ныне... ........ 13

Не умолчим никогда, Богородице... ...... 13

Кондаки:

Предстательство христиан... ........... 13

Не имамы иныя помощи... ............ 14

Тропари и величания общие святым

Пророку. .......................... 14

Апостолу .......................... 15

Святителю ......................... 15

Преподобному ...................... 16

Мученику. ......................... 17

Мученице. ......................... 17

IV. ТРОПАРИ И ВЕЛИЧАНИЯ

НА ПРАЗДНИКИ ГОСПОДНИ, БОГОРОДИЧНЫ

И СВЯТЫХ ВЕЛИКИХ

Рождество Пресвятой Богородицы ........... 19

Воздвижение Честнаго и Животворящего

Креста ............................ 20

Память прп. Сергия Радонежского .......... 20

Преставление св. апостола и евангелиста

Иоанна Богослова ................... 21

Память свт. Тихона, Патриарха Московского и всея Руси .................... 22

Покров Пресвятой Богородицы ............ 23

Празднование в честь чудотворной иконы Божией Матери “Иверская” ......... 24

Празднование в честь чудотворной иконы Божией Матери “Казанская”. ........ 25

Празднование в честь чудотворной иконы Божией Матери “Всех скорбящих Радость”........................... 26

Собор Архистратига Божия Михаила

и прочих Небесных сил безплотных ...... 27

Введение во храм Пресвятой Богородицы ...... 28

Память свт. Николая .................... 29

Память св. прав. Иоанна Кронштадтского .... 30

Рождество Господа нашего Иисуса Христа ..... 31

Обрезание Господне..................... 32

Память прп. Серафима Саровского ......... 32

Крещение Господне. Богоявление ............ 33

Память блж. Ксении Петербургской......... 34

Сретение Господне ...................... 35

Память свт. Алексия, Митрополита Московского. . . ...................... 35

Благовещение Пресвятой Богородицы. ........ 36

Память вмч. Георгия Победоносца .......... 37

Память свв. равноапостольных Кирилла

и Мефодия, учителей Словенских ....... 38

Празднование в честь чудотворной иконы Божией Матери “Владимирская”. ..... 39

Рождество Иоанна Предтечи .............. 40

Память свв. первоверховных апостолов

Петра и Павла ...................... 40

Память св. пророка Божия Илии ........... 41

Память вмч. и целителя Пантелеймона. ...... 42

Преображение Господне. .................. 42

Успение Пресвятой Богородицы............. 43

Перенесение Нерукотворенного образа

Господа Иисуса Христа ............... 44

, Усекновение главы Пророка, Предтечи

и Крестителя Господня Иоанна ......... 45

V. ПЕСНОПЕНИЯ * ИЗ СЛУЖБ ВЕЛИКОГО ПОСТА

В Неделю мытаря и фарисея .............. 46

Во Святой и Великий Понедельник ......... 46На литургии Преждеосвященных Даров ...... 47

В Неделю третью Великого поста — Крестопоклонную ....................... 48

На поклонении Кресту................... 48

VI. ПЕСНОПЕНИЯ ИЗ СЛУЖБ СВЯТОЙ ПАСХИ

Стихира .............................. 49

Тропарь .............................. 49

Кондак............................... 49

Ексапостиларий ........................ 50

Стихиры Пасхи ........................ 50

Часы Святой Пасхи ..................... 52

УП.ТРОПАРИ И ВЕЛИЧАНИЯ ПЕРЕХОДЯЩИХ ПРАЗДНИКОВ

Вход Господень в Иерусалим.

Неделя ваий, Цветоносная. ................ 55

Вознесение Господне ..................... 56

День Святой Троицы ..................... 56

Память Всех Святых. .................... 57

Память Всех Святых, в земли Российстей

просиявших ........................ 58

VIII. ПЕСНОПЕНИЯ ИЗ ПАНИХИДЫ

Тропари .............................. 59

Кондак. .............................. 60

ПРАВОСЛАВНАЯ ЛИТЕРАТУРА

в Москве (095) 231-05-96 (095) 915-51-04

АДРЕС СКЛАДА: Каланчевская улица, 16.